Mənim tədris apardığım kafedraya əsasən V və VI kurslar gəlirlər. Maksimum çalışırıq ki, tələbələr xəstələrin müayinəsində, müalicəsində və eləcə də aparılan manipulyasiyalarda fəal iştirak etsinlər. Onu da bildirim ki, Tədris Cərrahiyyə Klinikasının reanimasiya şöbəsində xəstələrimiz var. Biz burada xəstələr və mulyajlar üzərində tələbələrimizə cərrahi əməliyyatlarının gedişini və əməliyyatlardan sonrakı prosesi izləmək, müalicə taktikasının seçilməsində iştirak etmək imkanı yaradırıq. Müəyyən aparatların necə tətbiq olunduğunu, süni tənəffüz aparatına qoşulan xəstələri görürlər. Tədris Cərrahiyyə Klinikasında fəaliyyət göstərən treninq mərkəzində onlar üçün tədris proqramına uyğun xüsusi təlimlər keçirik”.

Praktiki vərdişlərin aşılanmasında əyani dərslərin rolundan danışan fakültə dekanı tələbələrin kiçik qruplarla imkan daxilində cərrahi bloklara da aparıldığını, amma istənilən halda epidemioloju durumun nəzərə alındığını bildirir. Qeyd edir ki, universitet rəhbərliyi tədris prosesini tam nəzarətdə saxlayır və tələbələrimizi mümkün qədər yoluxmadan qorumağa çalışır: “Bəzi tələbələr evdə yaşlı valideynlərinin olmasını əsas gətirərək dərslərin onlayn keçirilməsi xahişi ilə rektora müraciət edirlər. Ümumilikdə isə tələbələrin əksəriyyəti ənənəvi dərsin tərəfdarıdır. Ümidvarıq ki, yaxın gələcəkdə epidemioloji durum sabitləşəcək və dərslər əvvəlki məcrasına yönələcək”.