• 23/06/2016 00:00

Bu gün İsrailin nüfuzlu Ben-Gurion universitetinin  tibb mütəxəssisləri Azərbaycan Tibb Universitetində qonaq olublar. Xarici professorlar  ATU-nun Tədris Cərrahiyyə Klinikasını gəziblər, burada tələbələr və xəstələr üçün yaradılan şəraitlə yaxından tanış olublar.

İsraildən olan qonaqların həmçinin Azərbaycan Tibb Universitetinin rəhbərliyi ilə də görüşü baş tutub. Tanışlıq xarakterli görüşdə qarşılıqlı əməkdaşlıq məsələləri, təhsil-tədris planında dəyişikliklə sahəsində təcrübə ilə bağlı müzakirələr aparılıb.

Ben-Gurion Universitetinin Tibb elmləri fakültəsinin rəhbəri, kardiologiya üzrə professor Amos Katz təmsil etdiyi institutun fəaliyyəti, İsraildə tibb təhsili sisteminin quruluşu haqqında məlumat verib. Qeyd olunub ki, burada tibb tələbələri arasında 7 illik baza təhsilindən sonra ixtisas seçimi aparılır. İkinci növ tibbi təhsil isə 4 illik proqram üzrə keçirilir. İngilis dilində olan proqram üzrə təhsil alan  tələbələr dünyanın istənilən ölkəsində praktikadan keçə bilərlər.

A.Katz bildirib ki, onlar tərəfindən ictimai səhiyyə və səhiyyənin idarəolunması üzrə məzun proqramları da təşkil olunur: “Bundan əlavə, bizim komandamız təhsil-təlim formasını, tədris planını dəyişdirmək sahəsində də  fəaliyyət göstərir”. Professor Katz bu məsələlər üzrə Azərbaycan Tibb Universiteti ilə əməkdaşlıqda maraqlı olduqlarını bildirdi.

ATU rektoru, professor Gəray Gəraybəyli İsrail və Azərbaycan tibb təhsili sistemləri arasındakı oxşarlıqlardan danışıb. Azərbaycanda tibb sahəsində ali təhsilin strukturu haqqında məlumat verən rektor qeyd edib ki, rəhbərlik etdiyi universitet xarici əlaqələrin daha da gücləndirilməsi, tələbə və rezidentlərin mübadiləsinin daha da genişləndirilməsində maraqlıdır.

Professor Gəray Gəraybəyli ATU-da mövcud rezidentura sistemi haqqında məlumat verərək bildirib ki, əsas diqqət rezidentlərin praktiki biliklərinin artırılmasına yönəldilir: “İndiyədək Azərbaycan Tibb Universitetlərinin tələbə və rezidentləri bir sıra xarici ölkələrdə müxtəlif proqramlar üzrə təhsil alıblar, işləyiblər. Lakin bu əlaqələrin daha da genişləndirilməsinə, təcrübə mübadiləsini artırılmasına ehtiyac var”.  G.Gəraybəyli bəzi sahələrdə tibb təhsilinə daha modern yanaşma tələb olunduğunu da deyib.

Görüşün sonunda qonaqlara xatirə hədiyyələri təqdim olunub, foto çəkilib.

Qeyd edək ki, israilli qonaqlar sabah ATU-nun Stomatoloji, Tədris Terapevtik və Onkoloji Klinikaları ilə tanış olacaq, anatomiya muzeylərini gəzəcəklər.

 1969-cu ildə yaradılan Ben Gurion universiteti hazırda İsrailin ən böyük təhsil və tədqiqat mərkəzlərindən biri sayılır. Universitetin nəzdində bütün dünya üzrə məşhur olan İrvinq Qoldman adına tibbi məktəb fəaliyyət göstərir. Burada dünyanın hər yerindən tələbələr təhsil alır. 

Qeyd edək ki, Azərbaycanda səfərdə olan nümayəndə heyətinin tərkibində dr. Davıdoviç, dr. Aleks Geffer daxildir. Görüşdə ATU-nun xarici əlaqələr üzrə prorektoru Rəhimə Qabulova, ATU-nun beynəlxalq əlaqələr üzrə şöbə müdiri Nadir Zeynalov iştirak edirdilər.