Tədris Cərrahiyyə Klinikasının direktoru professor Surxay Hadıyev Azərbaycan Tibb Universitetinin klinik bazaları haqda məlumat verərək, elmi işlərin müalicə və tədris işləri ilə paralel aparılmasına auditoriyanın diqqətini cəlb etdi, elmi araşdırmaların aparılması üçün lazımi şəraitin olmasıni bildirdi.

II uşaq xəstəlikləri kafedrasının assistenti Sevinc Muxtarova JICA təşkilatının qrantı hesabına Yaponiyada 20 günlük treninq-seminarda iştirak etdiyini dedi və təəssüratlarını tədbir iştirakçıları ilə bölüşdü.

Yaponiya Beynəlxalq Əməkdaşlıq Agentliyinin Özbəkistanda yerləşən regional mərkəzinin müdiri Fuşimi Katsutoşi təşkilatın tarixi, Yaponiya hökumətinə aidiyyəti, qrant layihələrinin ayrılması prinsipi və müxtəlif dövlətlərin hökumətləri ilə əlaqələri barədə ətraflı məlumat verdi, bu qrant layihələrində Azərbaycanın da iştirak etdiyini bildirdi.

Tədbirin sonunda Dr. Sevinc Muxtarovanın layihəsi üçün nəzərdə tutulmuş avadanlıq – yenidoğulmuşlar üçün portativ RAD-5 puls-oksimetri və EMMA kapnoqrafı təqdim olundu.

Tədbirdə JICA təşkilatının Özbəkistan üzrə koordinatoru Farhod Kurbonov və Azərbaycan üzrə koordinatoru Nigar İsmayılova, həmçinin II uşaq xəstəlikləri kafedrasının və ATU Cərrahi Klinikasının neonatal xidmətinin əməkdaşları iştirak ediblər.