(+99412) 597-38-98

    Bədən tərbiyəsi və idman, həkimin ikinci peşəsidir! 
    Bədən tərbiyəsi və idman 1931-ci ildə Azərbaycan Dövlət Tibb İnstitutunun əmək gigiyenası kafedrasının nəzdində “kurs” kimi yaradılmışdır. Bu kurs 1933-cü ildə müstəqil “bədən tərbiyəsi və həkim nəzarəti” kafedrasına çevrilmiş, 1940-cı ildə institutun hərbi kafedrası ilə birləşdirilmişdir. Həmin illərdə tələbələrin ümumi fiziki hazırlığı ilə bərabər onların vətənpərvərlik ruhunda hazırlanmasına daha çox diqqət ayrılmışdır. 1941-1945-ci illərdə müharibə ilə əlaqədar olaraq idman klubu hərbi kafedranın nəzdində olduğuna görə, kafedranın tədris planında tələbələrin fiziki hazırlığı ilə yanaşı xüsusi hərbi hazırlıq proqramına üstünlük verilmişdir. 1946-1952-ci illərdə kafedra əməkdaşlarının əksəriyyəti həkim olduğundan təlim-tədris planları əsasən tələbələrin müalicə bədən tərbiyəsi yönümündə hazırlanması olmuşdur. 1952-1969-cu illərdə kafedrada idman klubunun yaradılması ilə əlaqədar idman işləri xeyli fəallaşmış və tələbələr idmanın müxtəlif növləri üzrə yarışlarda iştirak etmişdir. 
1969-cu ildə kafedra iki müstəqil kafedraya bölünmüşdür:
1. “Bədən tərbiyəsi və idman” kafedrası;
2. “Həkim nəzarəti və müalicə bədən tərbiyəsi” kafedrası;
1969-1983-cü illərdə institutun ayrıca idman bazası olmamasına baxmayaraq, tələbələr ali məktəblər arasında keçirilən spartakiadalarda müntəzəm çıxış etmişlər. 1984-cü ildə institutun öz idman kompleksinin istifadəyə verilməsi, institutda kütləvi-idman işlərinin inkişafına böyük təkan vermişdir. Hazırda universitetin idman kompleksinin 10 ixtisaslaşmış idman zalı, bir yüngül atletika maneji və 25 metrlik üzgüçülük hovuzu vardır. 
    1993-cü ildən başlayaraq "Gənclik" tələbə idman cəmiyyəti tərəfindən təşkil olunan ali məktəblər arasında müxtəlif idman növləri üzrə keçirilən Universiada və Spartakiadalarda ATU-nun tələbələrdən ibarət yığma komandası ən çox xal toplayaraq ümumi xal hesabında 25 il ardıcıl olaraq birincilik əldə etmiş və Super Kubokun sahibi olmuşdur. 
Beləliklə, 1969-cu ildən 2015-ci ilədək ATU-nun Bədən tərbiyəsi və idman kafedrası professor Kamal Keberlinskinin rəhbərliyi ilə bir çox nailiyyətlər əldə etmiş və makafatlar qazanmışdır. 2015-ci ildə Azərbaycan Respublikası Təhsil Nazirliyinin 46-11-5870/17 nömrəli məktubuna əsasən ATU-nun “Bədən tərbiyəsi və idman” kafedrası ləğv edilib,  “Təbib” idman klubu” yaradılmışdır. 
    Kafedraya rəhbərlik etmişlər:
1931–1950-ci illərdə dosent S.Q.Əliyev;
1951–1954-cü illərdə professor P.V.Blişenko, B.B.Muradov, A.İ.Buqayev;
1954–1969-cu illərdə dosent K.M.Axundov; 
1969–2021-ci illərdə professor K.Ə.Keberlinskiy;
2021-ci ilin mart ayından hal-hazıradək “Təbib” idman klubuna idman ustası, Azərbaycan Respublikasının əməkdar məşqçisi, beynəlxalq dərəcəli hakim Qələndər Asdan oğlu Aslanov rəhbərlik edir. 
    Kafedranın fəaliyyəti dövründə bədən tərbiyəsi və idmanın insan həyatındakı roluna həsr olunmuş 3 tədris vəsaiti, 500-ə yaxın elmi məqalələr, tezislər, 20-dən çox monoqrafiya yazılmış, müxtəlif yerli və xarici mənbələrdə çap olunmuşdur. 
     Hal-hazırda “Təbib” İdman Klubunda ali ixtisas təhsilli yüksək idman dərəcəsinə malik 14 məşqçi-müəllim çalışır. Onlardan 1 nəfər professor, 3 nəfər Respublikanın Əməkdar məşqçisi, 5 nəfər idman ustası, 1 nəfər karate üzrə IV dan qara kəmər ustası, 2 nəfər beynəlxalq dərəcəli hakim, 1 nəfər  Əməkdar Bədən Tərbiyəsi və İdman Xadimi fəxri adlarına layiq görülmüş kadrlardır.
    “Təbib” İdman Klubunun əsas məqsədi, tələbələrin hərbi vətənpərvərlik ruhunda tərbiyə olunması,  idmanla aktiv məşğul olanların həyat və sağlamlıqlarının qorunması, fiziki hazırlıqlarının inkişafı və təkmilləşdirilməsi, idmanın ayrı-ayrı növləri üzrə idman ustalıqlarının artırılması, mənəvi, əxlaqi və mübariz keyfiyyətlərə yiyələnməsi və hərtərəfli inkişaf etmiş kadrların hazırlanmasına yardım göstərməkdir.