Eldar Baxşəliyev Fətəli oğlu, 6 iyul 2004-cü ildə Masallı rayonunda anadan olmuşdur. 2010-cu ildə Bakı şəhəri, Xəzər rayonu, E.Şəmiyev adına 149 nömrəli tam orta məktəbə daxil olmuşdur. Orta təhsili dövründə Lütfizadə adına I Məntiq Olimpiadasının bürünc medalçısı, “Xəzər Universiteti”nin təşkil etdiyi “Təhsil ağlın simasıdır” adlı Riyaziyyat olimpiadasının qızıl medalçısı, “Əlaçı” televiziya yarışmasının 11-ci mövsümünün və digər Respublika səviyyəli müsabiqələrin qalibi olmuşdur. O həmçinin 2021-ci ildə keçirilmiş Respublika Fənn Olimpiadalarının Kimya fənni üzrə bürünc medalçısıdır.

2021-ci ildə həmin məktəbi “Xüsusi nümunəli attestat” və Qızıl medalla bitirmişdir.

Universitetə qəbul imtahanlarında 679.8 bal toplayaraq Azərbaycan Tibb Universitetinin II Müalicə-profilaktika fakültəsinə Prezident təqaüdü ilə qəbul olunmuşdur.

9-10 sentyabr 2022-ci il tarixlərində təşkil olunmuş “Türkiyə - Azərbaycan Anesteziologiya və Reanimasiya, Ağrı Workshop Günləri” elmi-praktiki konqresində iştirak etmiş, nəzəri və praktik bacarıqlara müvəffəqiyyətlə yiyələnmiş, sertifikata layiq görülmüşdür.

2022-ci ildən Fakültə Tələbə Elmi Cəmiyyətinin təşkilati heyətinin üzvü olaraq konfransların təşkilində aktiv iştirak edir. 2022-ci ildən Fakültə Elmi Şurasının üzvüdür.

“İctimai TV”-də yayımlanan “61!” universitetlərarası intellektual televiziya yarışmasının qalibi olmuşdur.

II MPF Tələbə Elmi Cəmiyyətinin 29 aprel 2024 tarixli konfransında, elmi tədqiqat mövzusu ilə çıxış etmiş, I yerə layiq görülmüş və fakültə dekanı tərəfindən diplomla təltif edilmişdir. 3-6 iyun 2024-cü il tarixlərində həmin elmi işlə Hollandiyanın “Groningen Universiteti”ndə keçirilən 31-ci “ISCOMS” konfransına dəvət olunaraq, orada Azərbaycanı layiqincə təmsil etmiş və münsiflər heyəti tərəfindən sertifikatla təltif olunmuşdur.

2024-cü ildə fakültənin tələbə dekanı seçilmişdir. Tələbə dekanı olaraq ATU-nun Elmi Şurasının üzvüdür. Tələbə dekanı kimi fakültə tələbələrini müxtəlif konfranslarda, iclaslarda layiqincə təmsil edir.  

Azərbaycan, ingilis, alman və türk dillərini bilir.