Bioqrafiya

Məhərrəm Zülfüqar oğlu Niftullayev 1947-ci il noyabr ayının 10-da Masallı rayonunun Ərkivan kəndində  anadan olmuşdur. 1965-ci ildə Ərkivan kənd orta məktəbini  bitirərərək,  N.Nərimanov adına  Azərbaycan Dövlət Tibb İnstitutunun sanitariya-gigiyena  fakültəsinə daxil olmuş və 1971-ci ildə  ali təhsilini uğurla başa vurmuşdur. 3 il təyinatla Q.Musabəyov  adına Elmi-Tədqiqat Mikrobiologiya, Virusologiya və Gigiyena İnstitutunda  kiçik elmi işçi    vəzifəsində işlədikdən sonra 1974-cü ildə Azərbaycan Dövlət Tibb İnstitutunun epidemiologiya kafedrasına baş laborant  vəzifəsinə  qəbul edilmiş, elə həmin vaxtdan da taleyini bu qocaman təhsil ocağına bağlamışdır. 1975-ci ildə assistent, 1993-cü ildə isə kafedranın professoru  vəzifəsinə seşilmişdir. 1979-cu ildə namizədlik, 1992-ci ildə isə doktorluq dissertasiyasını müdafiə etmiş və 2007-ci ildə professor elmi adını almışdır.

M.Z.Niftullayev kafedrada baş laborant vəzifəsindən başlayaraq, professor işlədiyi  hazırkı vaxta qədər özünü əməksevər, hərtəfli hazırlıqlı pedaqoq, epidemiologiya və tibbi helmintologiya sahəsində ixtisaslı mütəxəssis kimi göstərmişdir.  Müəllimlər və tələbələr üçün olan metodik işləmələrin təkmilləşdirilməsində, habelə mühazirə və təcrübə məşğələlərinin  mətnlərinin  hazırlanmasında fəal iştirak edir. M.Z.Niftullayev həmişə özünün elmi və pedaqoji səviyyəsini artırır. Bir neçə dəfə Leninqrad sanitariya-gigiyena institunun nəzdində olan ixtisasartırma fakültəsində  kursda olmuşdur. Eyni zamanda o, xarici ölkə alimləri ilə elmi əməkdaşlıq edir. Moskva Elmi-Tədqiqat Tibbi parazitologiya və Tropik  Təbabət İnstitutunun alimləri ilə  birgə qurduğu əməkdaşlıq Azərbaycan və Rusiya arasında  tibb elminin inkişafı amalına xidmət edir.

M.Z.Niftullayev 100 elmi məqalənin, o cümlədən 8 tədris vəsaitinin müəllifidir. Onun rəhbərliyi altında 8 namizədlik dissertasiyası yerinə yetirilmişdir.

Niftullayev M.Z. işlədiyi müddət ərzində kafedranın aparıcı professoru kimi  tədris-metodik işlərin yerinə yetirilməsində, dərs vəsaitlərinin, yeni proqramların və sillabusların  hazırlanmasında, dərslərin müasir texniki vəsaitlərlə təmin olunmasında, prezentasiyaların təşkili, tədris prosesi üçün metodik materialların hazırlanmasında, dərs otaqlarının informasiya kompüter texnologiyaları (İKT) ilə təchizatında, mühazirə dərslərinin  interaktiv üsullarla  keçirilməsində yaxından iştirak etmişdir. Tələbə  elmi cəmiyyətin xətti ilə tələbələrin elmi-tədqiqat işlərinə cəlb edilməsində yaxından iştirak edir. Tədris prosesi ilə yanaşı kafedranın elmi-tədqiqat işlərinin yerinə yetirilməsində də təcrübəli mütəxəssis kimi xidmətləri var.

M.Z.Niftullayev tibbi-profilaktika fakültəsinin ictimai həyatında fəal iştirak etmiş, uzun müddət fakultə Elmi şurasının üzvü olmuşdur. Hazırda da Elmi Seminar və İxtisaslaşdırılmış  Şuranın  üzvüdür.  O, Universitet əməkdaşları və tələbələri arasında böyük hörmətə malikdir.

Akademik fəaliyyət

2023 – ildən indiyə qədər epidemiologiya və biostatistika  kafedrasının professoru

1993 -   Azərbaycan Dövlət Tibb İnstitutunun epidemiologiya kafedrasında professor

1975- Azərbaycan Dövlət Tibb İnstitutunun epidemiologiya kafedrasında assistent

1974 - 2000  - Azərbaycan Dövlət Tibb İnstitutu epidemiologiya kafedrasında baş laborant

1971-1974 – Q.Musabəyov adına Elmi-tədqiqat Mikrobiologiya, Virusologiya və Gigiyena İnstitutu, kiçik elmi işçi

Təhsil

1992 –  Tibb elmləri doktoru

1979 –  Tibb elmləri namizədi Azərbaycan Tibb Universiteti, Bakı, Azərbaycan

1965 -1971 –  N.Nərimanov adına Azərbaycan Dövlət Tibb İnstitutunun  sanitariya-gigiyena fakültəsi,  Azərbaycan Tibb Universiteti, Bakı, Azərbaycan

1965 –  Masallı rayonu, Ərkivan kənd orta məktəbi bitirib

Peşə və pedaqoji inkişaf

1. 26 yanvar-5  fevral 2024-cü  il “Pedaqoji Peşəkarlığın inkişafı” kursu. Tibb və sağlamlıq   elmləri təhsili kafedrası, ATU, Bakı.
2. Azərbaycan Respublikası Səhiyyə Nazirliyi, Azərbaycan Tibb Universiteti və Qlobal Fondun  dəstəyi ilə “Epidemiya hazırlığı və cavablandırılması” mövzusunda treninq (17-19 mart, 2009-cu il.