Görüş zamanı Z.Abaszadə I, II və III kurslarda təhsil alan tələbələrin 2017-2018-ci tədris ilinin payız semestri ərzində fəaliyyətini əks etdirən hesabatla çıxış edib. Bu zaman tələbələrin davamiyyəti ilə bağlı ayrıca məlumat verilib. Davamiyyəti zəif olan tələbələrlə fakültə dekanı və dekan müavininin keçirdiyi görüşlər, payız semestri ərzində kredit borcu olan və təkrar dinləmələrə cəlb edilən tələbələr, qrup nümayəndələrinin fəaliyyətində olan nöqsanlar barəsində də məlumat səsləndirilib. 
Qarşıdan gələn qış sessiyası müddətində hər kurs üzrə imtahan günləri və müvafiq fənlər barədə ətraflı informasiya açıqlanıb. Z.Abaszadə sonda tələbələri fakültənin tələbə dekanı II kurs 641b qrup tələbəsi Ağazadə Xədicə İzzət qızı, fakültə tələbə həmkarlar təşkilatının nümayəndəsi II kurs 642b qrup tələbəsi Qocayeva Ella Azər qızı və fakültə gənclər və idman təşkilatının nümayəndəsi III kurs tələbəsi 626a qrup tələbəsi Quliyeva Xətayə Əliqismət qızı ilə tanış etdi.

Daha sonra fakültənin dekanı Anar Ağayev çıxış edərək tələbələri dərsə davamiyyətdə məsuliyyətli olmağa çağırdı. A.Ağayev universitetdə təhsil müddətində tələbələri onlar üçün yaradılan şəraitdən səmərəli istifadə etməyə, maksimum dərəcədə bilik əldə etməyə, dostluq münasibətləri qurmağa, bilik mübadiləsi aparmağa səslədi.

Sonra A.Ağayev tədris zamanı tələbələrin üzləşdiyi müxtəlif problemlərlə bağlı onların bəzi suallarını cavablandırdı. Dekan maraqlı təkliflərlə çıxış edən tələbələri diqqətlə dinlədikdən sonra bir sıra digər məqamlara aydınlıq gətirdi.

2 saatdan artıq davam edən görüşün sonunda fakültə dekanı Anar Ağayev tələbələrlə keçirilən bu günün çox maraqlı eyni zamanda, məhsuldar olduğunu qeyd etdi və gələcəkdə bu görüşün öz töhfələrini verəcəyindən əmin olduğunu bildirdi.