Əvəllər də yazdığımız kimi, reydlərin aparılmasında əsas məqsədi tələbələrin fikirlərini, rəylərini, şikayətlərini və təkliflərini öyrənməklə ictimailəşdirmək, qarşıya çıxan problemlərin həllinə nail olmaqdır.

Monitorinq zamanı insan anatomiyası, biologiya və tibbi genetika kafedralarında mühazirə zallarına, seminar və praktiki məşğələ otaqlarına daxil olan şura üzvləri tədris prosesini izləyiblər, tələbələrlə açıq diskussiya aparıblar. Qarşılıqlı fikir mübadiləsi aparılarkən tələbə-müəllim münasibətlərinə də toxunulub.

Dərs yükü ilə müqayisədə bəzi fənlərdən dərs saatının az olduğunu və bu amilin tədrisin keyfiyyətinə mənfi təsir göstərdiyini deyən tələbələr test imtahanlarında açıq sualların çoxluğundan və bəzi sualların tərtibindəki uyğunsuzluqdan da şikayətləniblər. Onlar cavabları rəqəmlə ifadə olunan sualların test imtahanına salınmasını məqsədəuyğun hesab etmirlər və bunu belə sualların əzbərçiliyə gətirib çıxarması ilə əsaslandırırlar.

Təkcə mənfi hallara deyil, təqdir olunası məqamlara da diqqət yetirən şuranın üzvləri insan anatomiyası kafedrasında yaradılan tədris şəraitindən razı qaldıqlarını bildiriblər.

Xatırladaq ki, qeydə alınan təklif və rəylər qruplaşdırılaraq müzakirə edildikdən sonra reydin nəticələri haqqında daha ətraflı məlumat veriləcək.