• 24/10/2022 15:21

Poliomielit insanın sinir sisteminə təsir edən və əzələ toxumasının iflici, atrofiyası, ölüm və ya əlilliyinə səbəb olan ən ağır virus xəstəliklərindən biridir. Hər il oktyabrın 24-də qeyd edilən Ümumdünya Poliomielitlə Mübarizə Gününün məqsədi ictimaiyyətin diqqətini poliomielitə və onun nəticələrinə cəlb etmək və həmçinin vaxtında profilaktik tədbirlərin görülməsinə yönəltməkdən ibarətdir.

 Ümumdünya Poliomielitlə Mübarizə Gününün oktyabrın 24-nün seçilməsi heç də təsadüfi deyil. Belə ki, bu gün poliomielitə qarşı tapılan peyvəndin müəllifi, Amerika epidemioloqu və virusoloqu Conas Solkun doğum günü ilə əlaqəlidir.

Poliomielit hava-damcı yolu ilə yayılan yoluxucu xəstəlikdir. Qısa müddət sonra öz təsirini göstərir, hərəkətin məhdudlaşması ilə müşahidə edilir. Adətən 15 yaşadək uşaqlar, nadir hallarda isə böyüklər yoluxa bilər. Daha çox 5 yaşınadək uşaqlar həmin xəstəlikdən əziyyət çəkirlər. Onun yeganə profilaktikası peyvənd olunmaqdır. Virusoloq Albert Seybin inaktivləşdirilmiş və canlı poliomielit əleyhinə vaksin hazırlayandan sonra 1988-ci ildə poliomielitə qarşı mübarizədə qlobal təşəbbüs yaranıb.

1995-ci ildən sonra ölkəmizdə poliomielit xəstəliyi qeydə alınmır. Azərbaycan 2002-ci ildə poliomielitdən azad region statusunu alıb. Lakin bütün dünyada poliomielit virusu ləğv edilməyənə qədər həmin xəstəliyə yoluxma təhlükəsi qalır. Həmin təhlükənin qarşısını almaq məqsədilə uşaqlar diri oral poliomielit vaksini (OPV) ilə peyvənd edilməlidirlər.

Ölkəmizdə Səhiyyə Nazirliyinin tibb müəssisələrində bütün uşaqlara poliomielitə qarşı peyvənd dövlət hesabına edilir. Peyvənd nəticəsində uşaqlarda poliomielitə qarşı immunitet yaranır. Poliomielitə qarşı peyvənd uşağın 4-7-ci günlüyündə, sonra 2, 3, 4 və 18 aylığında aparılır. Hər uşaq 2 yaşınadək həmin peyvəndin beş dozasını qəbul etməlidir.