11 aprel – Ümumdünya Parkinson Xəstəliyi ilə Mübarizə Günüdür

Ümumdünya Parkinson Xəstəliyi ilə Mübarizə Günü hər il Ümumdünya Səhiyyə Təşkilatının təşəbbüsü ilə müxtəlif tədbirlərlə qeyd olunur. Cari ildə bu günün mövzusu “Ruh sağlamlığı”dır. Bu il Böyük Britaniyada ilk dəfə olaraq parkinson xəstəliyindən əziyyət çəkən insanlar üçün Parkinson Ruh Sağlamlığı Dəstək Mərkəzi fəaliyyətə başlayacaq.

Xroniki xəstəlik olan parkinson  ilk dəfə 1817-ci ildə ingilis həkimi Ceyms Parkinson tərəfindən nevroloji sindrom kimi təsvir edilib.

 Parkinson ciddi hərəkət pozuntuları ilə müşayiət olunur. Əsas risk amilləri: yaş, ətraf mühitin təsiri, toksik və genetik faktorlardır. Xəstəliyin ilkin inkişafında simptomlar 21 yaşından 40 yaşınadək özünü göstərə bilər. Sağlam həyat tərzinə üstünlük vermək, zərərli vərdişlərdən, stress və fiziki passivlikdən uzaq olmaq həm xəstəliyin profilaktikasında, həm də müalicəsində əsas yer tutur.