• 03/09/2024 16:13

Tədris Stomatoloji Klinikasının Tamami Akademiyası ilə əməkdaşlığı müzakirə olunub

İordaniyanın tanınmış üz-çənə cərrahı, Beynəlxalq Üz-Çənə İmplantologiya Şurasının (International Board of Oral Implantology) prezidenti, “Tamimi” Akademiyasının sədri və təsisçisi, Prof. Dr. Mazen Tamimi  Azərbaycan Tibb Universitetinin (ATU) Tədris Stomatoloji Klinikasının qonağı olub.

Tanışlıq ziyarəti zamanı Klinikanın direktoru İmran Ağayev qonağa ATU-nun tədris proqramı,  klinikada dərs prosesinin təşkili haqqında ətraflı məlumat verib. Eyni zamanda, professor Mazen Tamimi Tədris Stomatoloji Klinikasının strukturu, şöbələri və kafedralarının işi, müəssisənin maddi-texniki bazası, infrastrukturu haqqında məlumatlandırılıb. İ.Ağayev ölkəmizdə stomatologiyanın inkişafı istiqamətində görülən işlər və bu sahədə yüksəkixtisaslı kadrların yetişdirilməsi üçün həyata keçirilən tədbirlər haqqında da danışıb, Klinikada bütün əsas stomatoloji sahələr üzrə çoxillik təcrübəyə malik yüksək ixtisaslı mütəxəssislər fəaliyyət göstərdiyini qeyd edib.

Səmimi qəbul üçün təşəkkür edən Dr.Mazen Tamimi iki ölkənin tibbi təhsil müəssisələri arasında əməkdaşlıq və mübadilə proqramlarından söz açıb. O, ikitərəfli münasibətlərin genişləndirilməsinin Azərbaycan və Iordaniyadan olan stomatoloqların təcrübə mübadiləsinin inkişafına böyük töhfə olacağını bildirib. Görüş zamanı ATU ilə “Tamimi” Akademiyası arasında əməkdaşlıq perspektivləri də müzakirə olunub.

Görüşdə, dekan dosent Elmira Əliyeva , Dekan müavini Aysel Həşimova , akademik məsləhətçi Həcər İsmayılova iştirak edirdi.

Daha sonra qonaq Tədris Stomatoloji Klinikada tələbə və rezidentlərin keyfiyyətli təhsili və praktikası üçün yaradılan şəraitlə tanış olub. Burada Terapevtik, cərrahi, ortopedik stomatologiya və digər tibbi sahələr üzrə göstərilən xidmətlər haqqında məlumatlandırılıb.

Qeyd edək ki, Beynəlxalq Üz-Çənə İmplantologiya Şurasının prezidenti Prof. Dr. Mazen Tamimi  həm də Duisburg-Essen (Almaniya), Qahirə (Misir) və Detroit (ABŞ) universitetlərinin qonaq professorudur. Onun təsisçisi olduğu “Tamimi” Akademiyası Floridada (ABŞ) Ağız-çənə cərrahiyyəsi və İmplant Stomatologiyası elminin tədrisi sahəsində dünyanın bir çox universitetləri,stomatoloji cəmiyyətləri ilə əməkdaşlıq edir. Prof. Dr. Mazen Tamimi 40-dan çox ölkədə stomatologiya sahəsində ixtisaslaşdırılmış kurslarda təlimçi kimi iştirak edib.