ATU-nun şəhid məzununun xatirəsi anılıb

Torpaqlarımızın işğaldan azad edilməsi uğrunda öz həyatını qurban vermiş ATU-nun məzunu, hərbi həkim-feldşer, gizir Fariz Şıxəliyevin anım günü tədbiri keçirilib

Hərbi tibb fakültəsinin təşəbbüsü ilə keçirilən tədbirdə fakültənin dekanı, tibb xidməti polkovniki Məharət Rzayev, tibb xidməti polkovnik-leytenantı Yaqub Qasımov, tibb xidməti polkovnik-leytenantı Rəşad Abdullayev, tibb xidməti mayoru Elxan Məmmədov, Tibbi mikrobiologiya kafedrasının müəllimi, İctimai səhiyyə fakültəsi həmkarlar təşkilatının sədri Səidə Hacıyeva və Hərbi tibb fakültəsinin Vətən müharibəsində şanlı döyüş yolu keçmiş məzunları iştirak ediblər.

Tədbir iştirakçıları xüsusi təyinatlı dəstədə qəhrəmancasına döyüşərək şəhidlik zirvəsinə ucalan Fariz Şıxəliyevin ailə üzvləri ilə görüşüb və onlara ATU kollektivi adından rektor, professor Gəray Gəraybəylinin başsağlığını çatdırıblar.

Vətən müharibəsi şəhidinin Şamaxı rayonunun Şəhidlər xiyabanında yerləşən məzarı da ziyarət olunub.

Xatırladaq ki, şəhidin 4 yaşında Əli adlı bir oğlu yadigar qalıb.