• 24/01/2025 17:20

Əməkdar elm xadimi, professor Vaqif Şadlinskinin 85 illik yubileyinə həsr edilmiş elmi-praktik konfrans keçirilib

Yanvarın 24-də Azərbaycan Respublikasının Əməkdar elm xadimi və Əməkdar həkimi, Nəsimi Rayon Ağsaqqallar Şurasının sədri, Rusiya Tibb Elmləri və Türk Dünyası Araşdırmaları Uluslararası Elmlər akademiyalarının akademiki, ATU-nun İnsan anatomiyası və tibbi terminologiya kafedrasının məsləhətçi-professoru Vaqif Şadlinskinin 85 illik yubileyinə həsr edilmiş elmi-praktik konfrans keçirilib.

Tədbir iştirakçılarını salamlayan ATU-nun rektoru, professor Gəray Gəraybəyli  qeyd edib ki, tanınmış ziyalıların, elm, mədəniyyət, ədəbiyyat xadimlərinin, səhiyyə və təhsil işçilərinin yubileylərinin keçirilməsi ölkəmizdə bir ənənə halını alıb. Əsası xalqımızın Ulu Öndəri Heydər Əliyev tərəfindən qoyulan bu ənənəni möhtərəm prezidentimiz İlham Əliyevin uğurla davam etdirdiyini, xüsusi fəaliyyətləri ilə seçilən şəxslərə həmişə yüksək qiymət verildiyini bildirib: “Bu gün universitetimizdə çox möhtəşəm bir gündür. Bildiyiniz kimi, bu il universitetimizin 95 illiyi qeyd olunur. Bu uzun illəri zənginləşdirən, tarixə çevirən isə görkəmli korifeylərimizdir. Onlardan biri də professor Vaqif Şadlinskidir. Mən taleyimdən çox razıyam ki, həyatımda həmişə yaxşı müəllimlərim olub və belə müəllimlərdən biri, bəlkə də birincisi elə Vaqif müəllimdir. Mənim Vaqif müəllimlə ilk tanışlığım 1984-cü il sentyabrın 1-də olub. O zaman universitetin 1-ci kurs tələbəsi olaraq Anatomiyadan ilk dərsdə iştirak etdik. İki semestr boyunca Vaqif müəllim bizə bu fənni tədris edib və tibb elmini sevdirən şəxs olub. Vaqif müəllim mənim ürəyimdə böyük müəllim və böyük ağsaqqaldır”.

Tələbəlikdə əziz müəllimindən tibb elminin incəliklərini öyrəndiyini söyləyən rektor, sadə, səmimi, uzaqgörən və müdrik insanın yubiley yaşını bir daha bütün professor-müəllim heyəti və tələbələr adından təbrik edərək, ona möhkəm cansağlığı, uzun ömür diləyib.

Bundan sonra professor V.Şadlinskinin ömür yolu və əmək fəaliyyətinə həsr olunmuş "Son məqsəd həqiqətdir" adlı sənədli film nümayiş etdirilib.

İnsan anatomiyası və tibbi terminologiya kafedrasının müdiri, dosent Anar Abdullayev yubilyarın keçdiyi elmi, pedaqoji və ictimai fəaliyyət yolu barədə məruzə edib. O bildirib ki, Vaqif Bilas oğlu Şadlinski 1940-cı ildə qədim Azərbaycan torpağı olan Vedi rayonunda dünyaya gəlib. 1948-1950-ci illərdə deportasiya nəticəsində ailə üzvləri ilə birlikdə Şəmkir rayonunun Çinarlı qəsəbəsində məskunlaşıb. 1959-cu ildə kənd orta məktəbini bitirdikdən sonra ordu sıralarında hərbi xidmətdə olub. 1963-cü ildə müvəfəqiyyətlə qəbul imtahanlarını verərək, N.Nərimanov adına Azərbaycan Dövlət Tibb İnstitutunun Stomatologiya fakültəsinə daxıl olub və 1968-ci ildə institutu fərqlənmə diplomu ilə başa vurub: “Vaqif müəllim 1970-ci ildə ATU-nun İnsan anatomiyası kafedrasında baş laborant kimi fəaliyyətə başlayıb, assistent, baş müəllim, dosent, professor vəzifələrinə qədər yüksəlib, 1995-ci ildə kafedranın müdiri vəzifəsinə seçilib. Onun elmi tədqiqatları klinik təcrübə üçün ümdə əhəmiyyət kəsb edən, proqram xarakterli fundamental konsepsiyalara çevrilib, bütöv tibbi istiqamətlərin – neyrocərrahiyyənin, tibbi antropologiyanın, dental implantologiyanın ölkəmizdə və onun sərhədlərindən çox-çox uzaqlarda inkişafına təkan olub”.

Sözünə davam edən məruzəçi vurğulayıb ki, V.Şadlinskinin rəhbərliyi altında Azərbaycan, rus və ingilis dillərində, hər fakültə üçün ayrıca dərsliklərin tərtibi işi həyata keçirilib. Bu dərsliklər hər bir ixtisasın özəllikləri əsas tutulmaqla hazırlanıb və tədrisin nəinki bu günü, eləcə də gələcəyi nəzərə alınıb: “2000-ci ildə Azərbaycan Respublikası Prezidentinin fərmanı ilə Vaqif Şadlinskiyə Əməkdar həkim fəxri adı verilib. 2004-cü ildə o, Rusiya Tibb Elmləri Akademiyasının akademiki, 2008-ci ildə Türk Dünyası Araşdırmaları Beynəlxalq Elmlər Akademiyasının, 2009-cu ildə Avropa Təbiət Elmləri Akademiyasının həqiqi üzvü seçilib və bu akademiyanın Albert Şveytser medalı ilə mükafatlandırılıb. O həmçinin 2009-cu ildə Türkiyənin Uluslararası Araşdırmalar Akademiyasının üzvü seçilib və həmin akademiyanın qızıl medalına layiq görülüb. V.Şadlinski BMT tərəfindən təsis olunmuş “I dərəcəli Hippokrat ordeni” və Hannoverdə beynəlxalq Konqresin təşkilat komitəsi tərəfindən Robert Kox medalı ilə təltif edilib.

2010-cu ildə Azərbaycan Respublikası Prezidentinin sərəncamı ilə V.Şadlinski Əməkdar elm xadimi fəxri adına layiq görülüb. O, 2014-cü ildə Rusiya Elmlər Akademiyasının üzvü seçilib. 2020-ci ildə Azərbaycan Respublikası Prezidentinin Sərəncamı ilə “Şöhrət” ordeni ilə təltif edilib.

V.Şadlinski “Anatom, Histoloq və Embrioloqlar elmi cəmiyyəti” ictimai birliyinin və 2021-ci ildən Nəsimi Rayon Ağsaqqallar Şurasının sədridir. Azərbaycan Respublikası Prezidentinin sərəncamı ilə 2022-ci ildə V.Şadlinski Prezidentin fərdi təqaüdünə layiq görülüb. 2024-cü ilin dekabrında Qərbi Azərbaycan həqiqətlərinin təbliği sahəsində fərqlənən bir qrup şəxsin təltif edilməsi haqqında Azərbaycan Respublikası Prezidentinin sərəncamı ilə akademik Vaqif Şadlinski “Azərbaycan Respublikası Prezidentinin fəxri diplomu” ilə təltif edilib”.

A.Abdullayev əlavə edib ki, vətənpərvərlik, el-obaya, doğma irsə bağlılıq akademik V.Şadlinskinin bütün dövrlərdə fəaliyyətinin qayəsini, strateji xəttini təşkil edib. Hər bir mühazirəni və təcrübə məşğələsini tutarlı dəlillərlə, konkret faktlarla klinika ilə nəzəriyyənin inteqrativ nümunəsinə çevirmək, hər mövzu üzrə bir deyil, bir neçə hadisə, elmi arqumentlər nümayiş etdirmək Vaqif müəllimim fitri istedadının nəticəsidir.

Natiq çıxışında V.Şadlinskinin ölkə səviyyəsində həyata keçirdiyi ictimai işlər, beynəlxalq əlaqələri, çap etdirdiyi elmi-pedaqoji əsərləri, rəhbərliyi altında hazırlanan elmi-tədqiqat işləri haqqında da geniş söhbət açıb, yubilyarı kafedranın bütün əməkdaşları adından təbrik edib.

Konfransda çıxış edən səhiyyə nazirinin müavini, dosent Nadir Zeynalov professor Vaqif Şadlinskini tələbələrin dostu adlandırıb. Vurğulayıb ki, Vaqif müəllim tələbələrə daim ədalətlə yanaşıb və eyni zamanda olduqca məsuliyyətli və tələbkar pedaqoq olub. Millət vəkillərindən Azərbaycan Respublikası Ağsaqqallar Şurasının sədri, professor Eldar Quliyev, Milli Məclisin Səhiyyə komitəsinin sədri, akademik Əhliman Əmiraslanov və Asif Əsgərov yubilyarı təbrik edərək ən xoş arzu və istəklərini dilə gətiriblər. Natiqlər onun elmə, tibbə, konkret olaraq Anatomiyaya bağlı olan həyat yolundan epizodlar danışıb və 60 ildən atıq elmi fəaliyyətini çox yüksək dəyərləndiriblər. Çıxışlarda vurğulanıb ki, bütün peşəkar fəaliyyəti tibb elminin və onun tədrisinin mükəmməlləşməsinə, təbabətin fundamenti olan Anatomiyanın inkişafına həsr olunmuş V.Şadlinskinin həyatı Vətənə, xalqa xidmət nümunəsidir. Gərgin əməyi, fitri təşkilatçılıq istedadı, həmkarları və tələbələrinin arxa-dayağı olmaq kimi xüsusiyyətləri sayəsində Vaqif Şadlinski təkcə tibb aləmində deyil, elm və təhsilin bütün sahələrində, ölkəmizdə və onun sərhədlərindən çox-çox uzaqlarda dərin hörmət qazanıb.

Tədbirdə ölkəmizdən və xaricdən yubilyara ünvanlanmış təbrik məktubları və teleqramlar diqqətə çatdırılıb.

Sonda professor Vaqif Şadlinski onu təbrik etməyə gələnlərə minnətdarlığını bildirərək deyib: “İlk dəfə 1970-ci il sentyabrın 1-də müəllim kimi auditoriyaya girmişəm. O vaxtdan sonra çox adamlar qolumdan tutub, himayədarlıq edib. Mənim elmi fəaliyyətimə həmişə böyük qayğı göstərən və dəstək verən mərhum və unudulmaz müəllimim professor Kamil Balakişiyevə, eləcə də həyatımın müxtəlif mərhələlərində mənə kömək əli uzadan hər kəsə minnətdarlıq edirəm. Ən böyük minnətdarlığım isə Ulu Öndər Heydər Əliyevin siyasi kursunu layiqincə davam etdirən və bu gün xalqımızın milli qəhrəmanına çevrilən Müzəffər Ali Baş Komandanımız Cənab İlham Əliyevədir”.

Rəsmi hissədən sonra konfrans öz işini elmi məruzələrlə davam etdirib.