Dağıstanlı tələbələrin ATU-dakı yay təcrübəsi başa çatıb

Bu gün Azərbaycan Tibb Universitetinin (ATU) rektoru, professor Gəray Gəraybəyli universitetdə yay təcrübəsi keçən dağıstanlı tələbələrlə görüşüb.

Praktika müddətində ATU-nun qonağı olan, Dağıstan Dövlət Tibb Universitetinin terapiya fakültəsinin professoru Ali Ajuboviç Hüseynov bu müddət ərzində tələbələr üçün yaradılan şəraitə görə rektor G.Gəraybəyliyə təşəkkür edib: “Tələbələrimiz üçün ATU-nun yataqxanalarında çox gözəl şərait yaradılmışdı. Bizim üçün universitetin özünün klinikalarının olması hələlik bir xəyal olaraq qalır. Sizin klinikalarda həm tədris, həm də keyfiyyətli tibbi xidmət üçün hər cür şərait var. Bu səfər bizim tələbələrimiz üçün unudulmaz bir təcrübə olacaq”. A.Hüseynov qeyd edib ki, Azərbaycan Tibb Universitetində təcrübə keçmək istəyən tələbələrin sayı hədsiz çox olduğundan, gərgin müsabiqə nəticəsində ən layiqli 7 namizəd seçilib.

ATU-nun rektoru, professor Gəray Gəraybəyli də öz növbəsində xoş sözlər üçün dağıstanlı həmkarına təşəkkür edib. Rektor bildirib ki, bu proqram ATU ilə Dağıstan Dövlət Tibb Universiteti arasında mövcud əməkdaşlıq müqaviləsi çərçivəsində atılan ilk addım kimi qiymətləndirilə bilər. 
G.Gəraybəyli bundan sonra ali məktəblər arasında qarşılıqlı əməkdaşlığın daha da güclənəcəyinə ümid etdiyini bildirib.

Qeyd edək ki, Dağıstan Dövlət Tibb Universitetinin tələbələri ATU-da terapiya üzrə yay təcrübəsi keçiblər. 2 həftə davam edən praktika müddətində tələbələr ATU-nun həm Tədris Terapevtik, həm də Tədris Cərrahiyyə Klinikalarında işləyiblər. Onlar ATU-nun beynəlxalq əlaqələr üzrə prorektoru Nadir Zeynalovun müşayiəti ilə Bakının görməli yerlərini gəziblər. Görüşün sonunda çıxış edən dağıstanlı tələbələr ATU-dakı xoş münasibət və yaradılan yüksək şərait üçün universitet rəhbərliyinə minnətdarlıqlarını bildiriblər.