Proqram zamanı Ukraynanın Xarkov Tibb Universitetinin tələbələri Klinikada tələbə və həkimlər üçün yaradılan şərait, müəssisənin texniki təchizatı ilə tanış olublar. Onlara məlumat verilib ki, Tədris Terapevtik Klinika 2007-ci ildə prezidentin fərmanına əsasən yaradılıb. Hazırda klinikada yüksək profilli həkimlər tibbi xidmət göstərir və bu müəssisə modern tibbi avadanlıqla təchiz olunub.

Klinikanın direktoru S.Allahverdiyevin sözlərinə görə, klinik fənlərin tədrisi ilə məşğul olan kafedraların vahid mərkəzdə cəmləşdirilməsi tələbələrin praktika keçməsi işini asanlaşdırıb. Həmçinin, gələcək həkimlərin elmi tədqiqat işlərinin aparılması üçün əlavə imkanlar yaradılıb. Bütün bunlar tələbələrin aldıqları nəzəri bilikləri dərinləşdirməsi və sonrakı əmək fəaliyyətində istifadəsini təmin etməsinə imkan verir.

Qonaqlar ATU-nun Tədris Terapevtik Klinikasında tələbələ üçün yaradılan şəraitdən məmnun qaldıqlarını, təcrübənin uğurla yekunlaşacağından əminliklərini bildiriblər. Xarkov Tibb Universiteti tələbələrinin istehsalat təcrübəsi iyulun 13-dək davam edəcək.

Qeyd edək ki, istehsalat təcrübəsinin əsas vəzifələri tələbələri ixtisasın profilindən və xüsusiyyətindən asılı olaraq, yeni texnologiyalarla, iş üsulları ilə, elmi-tədqiqatlarla və digər məsələlərlə tanış etmək, tələbələrdə işgüzarlıq, təşkilatçılıq və kommunikativ vərdişləri aşılamaqdan ibarətdir.