12 illik evlilik həyatı, sonlanmayan hamiləlik və düşüklərdən sonra Tovuzdan Əəsvərovlar ailəsi əkiz uşaq sahibi ola bilib. Bu barədə Azərbaycan Tibb Universiteti (ATU) Tədris Cərrahiyyə Klinikasının I mamalıq-ginekologiya kafedrasının dosenti, tibb üzrə fəlsəfə doktoru Natavan Axundova məlumat verib.

Həkimin sözlərinə görə, Tovuz rayonundan olan 32 yaşlı G.Əsgərova 12 il ərzində iki dəfə hamilə qalıb, lakin hər dəfə döl inkişafdan qaldığına görə hamiləlik sonlanmayıb: “Xanımın anamnez məlumatlarında boru-peritoneal amilin olması, yumurtalıqların rezerv imkanlarının azalması, birincili hipotireoz (qalxanabənzər vəzin funksiyasının azalması) aşkar edilmişdi. Növbəti hamiləlik bizim nəzarətimiz altında keçdi. Elə hamiləliyin ilk həftələrindən ciddi problemlər yarandı: başlanmış düşük, erkən və gec düşük təhlükəsi, vaxtından qabaq doğuş təhlükəsi, istmiko-servikal çatışmazlıq, kənari cift gəlişi və s. Fəsadlaşmalar vaxtında dəf edildi və hamiləlilik 29 həftəsində həyati göstərişlə qanaxma səbəbindən sonlandırıldı».