• 19/01/2023 18:00

Azərbaycan Tibb Universitetinin rektoru yanında İctimai Nəzarət və Məsləhət Şurasının üzvləri universitetdə keçirilən imtahan prosesinin gedişatını izləyiblər. Şuranın sədri, millət vəkili, həkim-qastroenteroloq İlham Məmmədov və şura üzvləri – “Asan Radio”nun direktoru Emin Musəvi, “Cəmiyyətin və Vətəndaş Münasibətlərinin İnkişafı” İctimai Birliyinin sədri Əhməd Abbasbəyli və ATU-nun Əczaçılığın texnologiyası və idarəçiliyi kafedrasının baş müəllimi, “Gənc vətəndaş” İctimai Birliyinin sədr müavini Aidə Bəndəliyeva imtahan öncəsi və imtahan prosesində tətbiq olunan yeniliklərlə maraqlanıblar. Bu barədə İmtahan Mərkəzinin müdiri, filologiya üzrə fəlsəfə doktoru Ülkər Cəfərova açıqlama verərək 2022-2023-cü tədris ilinin payız semestrinin qış imtahan sessiyasına dekabrın 29-da başlanıldığını və imtahan sessiyasının cədvələ uyğun olaraq fevralın 1-də bitəcəyini bildirib: “Boloniya sisteminin özəlliyi ondadır ki, tələbənin 3 gün ərzində bu semestrdə kəsildikləri fənnin kreditinin 25 faizini ödəməklə yenidən imtahan vermək şansı var. Universitetimizdə imtahanlar modul proqramı üzərindən kompüterlə aparılır. Bu proqram artıq 2016-cı ildən tətbiq olunur. Hər il ümumi təhsilin keyfiyyətinin artırılması məqsədilə obyektv və şəffaf qiymətləndirmə üzərindən irəliləyişlər, yeni nailiyyətlər olur. Qayda belədir ki, tələbəyə öz şəxsi kabinetində nümunəvi test tapşırıqları verilir. PDF formatında yerləşdirilən test tapşırıqlarının cavabları qarışıq halda verilir. Açıq tipli test tapşırıqları daha yüksək bal almaq istəyən tələbələr üçündür. Hazırlıqlı tələbə bu tapşırıqları asanlıqla yerinə yetirərək yüksək bal toplayır”.

Yəni cavablar İmtahan Mərkəzi tərəfindən xüsusi proqramla qarışdırılır. Bütün bunlar isə “Elektron universitet”in, Türkiyədə və başqa Avropa ölkələrində mövcud olan modul proqramın tətbiqi ilə həyata keçirilir. Keçən tədris ilindən nümunəvi test tapşırıqlarının sayı elektron tədris sistemində maksimuma endirilib, 100 civarındadır. Belə suallar ixtisas fənlərindən 8-10, qeyri ixtisas fənlərindən isə 5-dən çox deyil. Qalan suallar isə tələbələr üçün gizli saxlanılır. Məqsəd tələbələri əzbərçilikdən uzaqlaşdırmaq, onlarda dərsliklərlə, kitablarla işləmək vərdişi yaratmaqdır.

Şuranın üzvləri imtahanın gedişində tələbələrin və nəzarətçilərin də fikirlərini öyrəniblər. Tələbələrdən Samirə Sadıqova, İradə Ağazadə, Səidə Məmmədova, Laçın Əliyeva, Rəhimə Sultanlı və Cənubi Azərbaycandan Elfan İsgəndəri testlərə proqrama uyğun sualların salındığını, imtahan prosesinin çox rahat keçdiyini söyləyiblər.

 İmtahan-nəzarət qrupunun rəhbəri Pəri İsaqova, nəzarətçilərdən Yoluxucu xəstəliklər kafedrasının baş laborantı Alidə Mətiyeva, Ailə təbabəti kafedrasının əməkdaşı Günəş Babayeva, II Daxili xəstəliklər kafedrasının əməkdaşı Yaqut Quliyeva, Uşaq stomatologiyası kafedrasının əməkdaşı Səid Cabbarov və Xarici dillər kafedrasının baş laborantı Svetlana Sultanova imtahanın gedişində indiyədək neqativ hala yol verilmədiyini bildiriblər.

Universitetdə tətbiq olunan yenilikləri müsbət qiymətləndirən şuranın üzvləri ATU-nun Apellyasiya Komissiyasının işi ilə də tanış olaraq tələbələrin şikayətlərini dinləyiblər. Əsas şikayətlər dərsdə keçilməyən mövzuların test tapşırıqlarına salınması ilə bağlı olub. Şuranın üzvləri şikayətlərin yerindəcə əsaslandırılması, tələbə məmnunluğunun təmin edilməsi barədə tövsiyələrini diqqətə çatdırıblar.

Şuranın sədri İlham Məmmədov cəmiyyətin bütün sahələrində olduğu kimi, təhsildə də ictimai nəzarətin zəruriliyini vurğulayıb. Bu istiqamətdə təkmilləşməyə hər zaman ehtiyac olduğunu söyləyərək, vətəndaş cəmiyyəti ilə rəsmi qurumlar arasında əməkdaşlığın aparılan islahatlara müsbət təsirindən danışıb.