• 03/11/2025 13:10

Epilepsiya Əleyhinə Azərbaycan Liqası böyük məmnuniyyətlə bildirir ki, epileptik tutmaların yenilənmiş təsnifatı artıq Azərbaycan dilində istifadəyə verilib

Epilepsiya ilə mübarizəni gücləndirmək məqsədilə 1909-cu ildə yaradılmış Epilepsiya Əleyhinə Beynəlxalq Liqa (International League Against Epilepsy, ILAE) hazırda tibb sahəsində dünyanın ən nüfuzlu beynəlxalq qurumlarından biridir. Təşkilata 130-a yaxın ölkə, o cümlədən Azərbaycan da üzvdür.

ILAE-nin xüsusi komissiyaları epilepsiyanın və epileptik tutmaların təsnifatı, diaqnostik və müalicəvi yanaşmalara dair tövsiyələri mütəmadi şəkildə yeniləyir. Epilepsiyanın və epileptik tutmaların təsnifatı sonuncu dəfə 2017-ci ildə yenilənib, 2025-ci ildə isə müəyyən terminoloji dəyişikliklər əlavə edilib.

Epilepsiya Əleyhinə Azərbaycan Liqası, artıq 25 ildir ki, ILAE-nin Azərbaycandakı rəsmi nümayəndəliyi kimi fəaliyyət göstərir. Liqa bu dəfə də beynəlxalq təşkilatın yenilənmiş təsnifatını uğurla Azərbaycan dilinə tərcümə edərək ILAE-yə təqdim edib.

Bununla da, epileptik tutmaların yenilənmiş təsnifatının Azərbaycan dilində versiyası artıq ILAE-nin rəsmi internet səhifəsində ictimaiyyət üçün əlçatandır.

Yeni təsnifatla tanış olmaq üçün aşağıdakı linkdən istifadə edə bilərsiniz:

https://www.ilae.org/updated-classification-epileptic-seizures-2025