Simvolik olaraq “çəhrayı lent” ayı kimi xarakterizə edilən oktyabr ayı boyunca media orqanları, tibbə dair KİV-lərdə maarifləndirmə xarakterli materiallar yayılır, səhiyyə müəssisələrində daha çox təbliğat işləri aparılır.

Dünya Səhiyyə Təşkilatı hər qadının ildə heç olmasa bir dəfə müayinə olunmasını vacib sayır. Azərbaycan Tibb Universitetinin Tədris Terapevtik Klinikasında süd vəzi xərçənginin erkən aşkarlanmasında 97 faiz həssaslıq nümayiş etdirən, radioloji müayinələr arasında “qızıl standart” metodu kimi dəyərləndirilən rəqəmsal mammoqrafiya aparatı mövcuddur.

Müayinələr radioloq-mammoloq, Tibb Universitetinin Şüa diaqnostikası və terapiyası kafedrasının assistenti Günel Qəmbərova tərəfindən aparılır.

Azərbaycan Tibb Universiteti “Sağlamlığınız sizin öz əlinizdədir”, “Erkən qoyulmuş diaqnoz həyat qurtarır” devizi əsasında xanımları süd vəzi xərçəngi ilə mübarizə ayında aktiv olmağa, xəstəliklə mübarizə aparmağa, vaxtında müayinə olunmağa çağırır.

Qeyd edək ki, radioloq-mammoloq Günel Qəmbərova süd vəzinin xərçəngəqədər dövrünün erkən aşkarlanması sahəsi üzrə mütəxəssisdir. Onun bu mövzuya dair yerli və xarici jurnallarda 42 elmi məqaləsi dərc olunub.