Atatürk Universiteti ilə elmi əməkdaşlıq davam edir

Azərbaycan Tibb Universitetinin Əczaçılıq texnologiyası və idarəçiliyi kafedrasının dosenti, əczaçılıq üzrə fəlsəfə doktoru Sevil Mehralıyeva  Türkiyədə tədqiqatlarda iştirak edir. S.Mehralıyeva Ərzurum şəhərindəki Atatürk Universitetində Təbii mənşəli xammallar əsasında nano dərman formalarının alınması istiqamətində tədqiqatlar aparır.

ATU-nun təmsilçisi səfər zamanı Atatürk Universitetinin Tibb və Əczaçılıq fakültəsinin professor-müəllim heyəti ilə görüşüb.  Görüşdə Altay Respublikasından Azərbaycana gətirilmiş,  yerli iqlim şəraitinə uyğunlaşdırılmış maral pantalarının tərkibinin unikallığı, yeni tətbiq sahələrinin  axtarışı istiqamətində geniş  diskussiyalar aparılıb. Maral pantalarından  Rusiya və Cənub-Şərqi Asiyada müxtəlif dərman və kosmetik  vasitələrinin istehsalında, sonsuzluq, ürək-damar, dayaq-hərəkət sistemləri, sinir və həzm sistemi və s.  xəstəliklərinin müalicəsində  tətbiq olunduğu  da vurğulanıb.

Tədqiqat zamanı S.Mehralıyeva maral pantalarından laboratoriya şəraitində  hazırladığı nanokapsullar, nanoemulsiya və nanogelin analizlərini Atatürk Universiteti Doğu Anadolu Yüksək Texnoloji Uygulama ve Araştırma Mərkəzinin (DAYTAM) aparıcı mütəxəssisləri ilə birlikdə uğurla  yerinə yetirib.

Birgə işlər çərçivəsində maral pantalarından  hazırlanan nanodərmanlardan osteoartrit, yaddaş zəifliyi , vaxtından əvvəl yaşlanmadan  əziyyət çəkən pasiyentlərə kömək məqsədilə ATU və Atatürk Universitetinin birgə əməkdaşlığı  ilə layihələrin hazırlanması təşəbbüsü də irəli sürülüb.