ATU-da 6-cı Uroonkoloji qış konqresi keçirilir

Bu gün Azərbaycan Tibb Universitetində  6-cı Uroonkoloji qış konqresi işə başlayıb. Türkiyə və Azərbaycan Səhiyyə Nazirlikləri, Azərbaycan   Tibb   Universiteti və Milli Onkologiya   Mərkəzinin    dəstəyi    ilə  keçirilən bu toplantıda mötəbər qonaqlar, yerli və xarici mütəxəssislər iştirak edir.

Açılış mərasimində çıxış edən ATU-nun rektoru, akademik Əhliman Əmiraslanov uroonkologiya üzrə növbəti konqresin Bakıda keçirilməsindən məmnunluq duyduğunu qeyd edərək bildirdi ki, bu konqres son illər Azərbaycanda keçirilən elmi konfranslar arasında    xarici qonaqların sayının çoxluğuna görə seçilir. Onun sözlərinə görə, bu cür konqreslər Azərbaycan səhiyyəsində son illərdə əldə olunan nailiyyətləri paylaşmağa, həm də təcrübə mübadiləsi aparmağa imkan verir.  Ə.Əmiraslanov  ölkəmizdə bütün sahələrdə olduğu kimi uroonkologiya sahəsində də ciddi irəliləyişlər olduğunu  bildirdi. Çıxışının sonunda rektor konqres iştirakçılarına uğurlar dilədi.

Sonra Səhiyyə nazirinin müavini Elsevər Ağayev, Türkiyə Cümhuriyyətinin səhiyyə nazirliyinin təmsilçisi Eyüp Gümüş, Avrasiya Uroonkoloji dərnəyinin həmsədri  Prof. Dr. Ali İhsan Taşçı, Türkiyənin Azərbaycandakı səfiri Alper Coşğun, İstanbul Universitetinin rektoru Prof. Dr. Yunus Söylet və digər mötəbər qonaqlar çıxış edərək belə möhtəşəm tədbirin Azərbaycanda keçirilməsindən məmnun olduqlarını, uroonkologiya sahəsində dünyaca məşhur mütəxəssislərin təcrübə mübadiləsinin inkişafa səbəb olacağını vurğulayaraq konfransın işinə uşurlar arzuladılar.

Amerika,  Avropa  və  Asiya ölkələrindən  300-ə   qədər ,  Azərbaycandan  isə    200-ə   yaxın   iştirakçının   toplandığı   konqresdə   150-dən   çox   məruzə   dinləniləcək.  Ümumilikdə konqres zamanı 130-dan çox poster, 20-dən çox video təqdimatlar keçiriləcək.

Konqres zamanı böyrək, sidik kisəsi, prostat vəzi və xayaların  onkoloji  xəstəliklərində  yeni    yanaşma  protokolları,  endoskopik, laporoskopik, transrektal  və  robotik  cərrahiyyənin yeni metodları  və  ən  son  nailiyyətləri  ilə bağlı çıxışlar səsləndiriləcək.  6 iclas   salonunda  paralel sessiyalar təşkil olunacaq. Aparılan   elmi   müzakirələrlə   yanaşı   Tədris   Cərrahiyyə   Klinikasının   Tədris   Treninq   Mərkəzində   endoskopik  əməliyyatlar   və  digər   praktiki   məşğələ   kursları   təşkil olunacaq.

Konqres yanvarın 31-dək davam edəcək.

Xatırladaq ki, bundan əvvəl Uroonkoloji konqreslər İstanbulda və daha sonra Uludağ, Girne, Antakya və Üsküpdə keçirilib.