• 12/05/2015 00:00

   Bu həftə Azərbaycan Tibb Universitetində (ATU) Türkiyəli mütəxəssislərin iştirakı ilə rezidentlər üçün seminarlara start verilib. Tədbirdə Türkiyənin Cümhuriyyət Universitetinin Tibb fakültəsinin əməkdaşları iştirak ediblər.

   Mevlana Mübadilə Proqramı çərçivəsində baş tutan seminar zamanı Sivas şəhərində yerləşən Cümhuriyyət Universitetinin Ümumi Cərrahlıq kafedrasının Cərrahi Onkologiya şöbəsinin professoru Kurşat Karadayı "Bədxassəli peritoneal mezoteliomada hipertermik kimya perfuziyası" mövzusunda mühazirə ilə çıxış edib. Döş qəfəsi cərrahlığı kafedrasının dosenti Şülə Karadayı isə "Emfizema zamanı həcm azaldıcı əməliyyatlar" və "Pnevmotoraks" mövzuları ilə bağlı məlumatları açıqlayıb.

   Səfər zamanı türkiyəli mütəxəssislər həmçinin ATU-nun Tədris-Cərrahiyyə  Klinikasında gənc müəllim və rezidentlərlə görüşüblər, klinikalarda yaradılmış şərait, iş rejimi ilə tanış olublar. Daha sonra türkiyəli qonaqlar ATU-nun Xarici Əlaqələr üzrə prorektoru  Rəhimə Qabulova ilə də görüşüblər.

   Görüş zamanı ATU-nun rezidentlərinin Sivasdakı Cümhuriyyət Universitetində təcrübə keçməsinin təşkili ilə bağlı məsələ  müzakirə olunub. Universitetlər arasında rezident mübadiləsinə dair protokolun hazırlanması və yaxın zamanlarda imzalanmasına dair ilkin razılıq əldə olunub. Görüşdə ATU-nun beynəlxalq əlaqələr şöbəsinin müdiri Nadir Zeynalov, ATU-nun Mevlana Mübadilə Proqramı üzrə koordinatoru İsmayıl Əfəndiyev iştirak ediblər.

   Qeyd edək ki, növbəti həftə Cümhuriyyət Universitetinin professorları ATU-nun Onkoloji Klinikasında rezidentlər qarşısında mühazirə ilə çıxış edəcək, həmçinin rezidentlərin ATUREK konfransına da qatılacaqlar.