Konfransın elmi hissəsində üz-çənə cərrahiyyəsi üzrə mütəxəssis Məhəmməd Davudov “Baş-boyun nahiyəsi rekonstruktiv cərrahiyyəsində müxtəlif növ dilimlərin istifadəsinə yanaşma” mövzusunda geniş mühazirə ilə çıxış etdi.

   Məhəmməd Davudov ATU-nun Tədris Cərrahiyyə Klinikasında üz-çənə nahiyəsinin eləcə də baş-boyun nahiyəsi müxtəlif patologiyalarının diaqnostikası və müalicəsinin aparıldığını bildirdi. Mütəxəssisin sözlərinə görə, Klinikada aparılan elmi və praktik fəaliyyətin əsasını onkoloji xəstəliklər, o cümlədən xoşxassəli və bədxassəli törəmələr, iltihabi xəstəliklər təşkil edir.

   “Son zamanlar bizim şöbədə plastik rekonstruktiv cərrah uzmanın fəaliyyəti ilə birlikdə briqada şəklində sərbəst ayaq damarcıqları (free flap ) ilə əməliyyatlar icra edirik. Bu sahədə fəaliyyətimizi davam etdirir və daha da genişləndirməyi düşünürük”.

Qeyd edək ki, Məhəmməd Davudov 2001-ci ildə ATU-nun Stomatologiya fakültəsini bitirib, 2001-2002-ci illərdə 1 saylı şəhər klinik xəstəxanasının üz-çənə cərrahiyyəsində internatura keçib. 2002-ci ildən ATU-nun ağız və üz-çənə cərrahiyyəsi kafedrasında baş laborant işləyib, 2008-ci ildə tibb elmləri namizədi alimlik dərəcəsi üzrə müdafiə edib.

   M.Davudov 2010-cu ildə Tehran Tibb Elmləri Universiteti onkoloji institutunda 1 il ərzində baş-boyun cərrahiyyəsi şöbəsində followship proqramını keçib. 2011-ci ildən ATU-nun Tədris Cərrahiyyə klinikasının ağız və üz-çənə cərrahiyyə şöbəsinin müdiri vəzifəsində çalışır.