Azərbaycan Tibb Universitetinin dəri və zöhrəvi xəstəliklər kafedrası, 1919-cu ildə yaradılmış və sonradan Azərbaycan Dövlət Universiteti adlanan Bakı Universitetinin  tibb fakültəsi mövcud olduğu dövrdə - 1920-1921-ci illərdə təşkil olunmuş ilk kafedralardandır.

1922-1930-cu illərdə dəri və zöhrəvi xəstəliklər kafedrasının ilk müdiri, Moskva dermatoveneroloqlar məktəbinin banisi, professor A.N.Pospelovun tələbəsi, görkəmli rus dermatoveneroloqlarından biri, Moskva Dövlət Universitetinin professoru, t.e.d. Mixail Aleksandroviç Çlenov (1871-1936) olmuşdur. Təcrübəli klinisist, erudit pedaqoq və alim M.A.Çlenov Azərbaycanda fəaliyyət göstərdiyi dövrdə çoxlu sayda ixtisaslaşmış milli mütəxəssis-dermatoveneroloqlar hazırlamışdır ki, bunların da əksəriyyəti elmlər doktoru və elmlər namizədi olmuşdur: İ.M.İsmayılzadə, M.K.Sultanov, Ə.C.Cəfərov, M.M.Hüseynov, D.İldırım, D.S.Xudatov, M.X.Hüseynova, H.K.Hüseynov. Onun rəhbərliyi altında regional patologiyalara aid aktual suallar üzrə bir sıra elmi-tədqiqat işləri yerinə yetirilmişdir: dəri leyşmaniozu, maduromikoz, cüzam.  

1930-cu ildə ADU-nun tibb fakültəsi Azərbaycan Tibb İnstitutu ilə əvəz edildi. Tibbi tədris 2 dildə - azərbaycan və rus dillərində aparılmağa başlandı. Bu səbəbdən 2 dəri və zöhrəvi xəstəliklər kafedrası təşkil edildi. Azərbaycan dilində tədris aparılan kafedraya ə.e.x., professor İ.M.İsmayılzadə, rus dilində tədris aparılan kafedraya professor M.K.Sultanov rəhbərlik etmişdir.

1933-1938-ci illərdə azərbaycan dilində tədris aparılan dəri və zöhrəvi xəstəliklər kafedrasının müdiri t.e.d., professor İbrahim Məmməd oğlu İsmayılzadə (1898-1962) olmuşdur. O, ilk azərbaycanlı alim-dermatoveneroloqrarından biri idi. İ.M.İsmayılzadə ali tibbi təhsilin təşkilində aktiv iştirak etməklə, elmi katib, dekan (1927-1931), institutun elmi və tədris işləri üzrə prorektorunun (1936-1937) vəzifə borcunu yerinə yetirmişdir. Kafedrada onun rəhbərliyi altında dəri leyşmaniozu, naftalan terapiyası, neft və neft məhsullarının dəriyə təsiri haqqında suallara həsr edilmiş elmi-tədqiqat işləri aparılmışdır. İ.M.İsmayılzadənin əldə etdiyi ən yüksək nailiyyət azərbaycan dilində tərtib etdiyi dərs vəsaitləri: dəri xəstəlikləri üzrə ilk dərslik, 1933-cü ildə 3 dildə (latın-rus-azərbaycan) nəşr olunmuş ümumi tibbi terminologiya və dəri-zöhrəvi xəstəliklərin terminologiyası üzrə lüğət, bir sıra elmi-populyar kitabçalar olmuşdur. İ.M.İsmayılzadənin azərbaycan dilində nəşr edilmiş işləri elmi-təcrübi milli kadrların hazırlanmasına böyük köməklik göstərmişdir.

1933-1939-cu illərdə rus dilində tədris aparılan dəri və zöhrəvi xəstəliklər kafedrasının müdiri t.e.d., professor Məlikbəy K.Sultanov (1880-1939) olmuşdur. Kafedrada aparılan elmi-tədqiqat işləri dəri leyşmaniozu, cüzam, dermatomikoz, sifilis və dəri vərəminə həsr olunmuşdur. M.K.Sultanovun “Cüzam və lepromanın histogenezi zamanı dəridə histoloji dəyişikliklərinin öyrənilməsi haqqında” (1927) doktorluq dissertasiyası çox dəyərli olmaqla, Azərbaycan Respublikasında cüzamla mübarizə tədbirlərinin təşkil edilməsində böyük rol oynamışdır.

1938-1964-cü illərdə azərbaycan dilində tədris aparılan dəri və zöhrəvi xəstəliklər kafedrasına t.e.d., professor Əbdül Xaliq Cəfər oğlu Cəfərov (1890-1964) rəhbərlik etmişdir. O, 1930-cu ildə “İnsan dərisinin patoloji və fizioloji piqmentasiyası” mövzusunda doktorluq dissertasiyasını müdafiə etmişdir. Ə.C.Cəfərovun rəhbərliyi altında kafedrada regional patologiya üzrə tədqiqat davam etdirilmişdir: Azərbaycanda dəri leyşmaniozunun endemik ocaqlarının və  patomorfoloji təzahürlərinin öyrənilməsi. Xroniki dermatozların naftalan neftinin tətbiq etməklə müalicəsi və zöhrəvi xəstəliklərlə mübarizə tədbirlərinin təşkil edilməsi metodlarının mükəlləşdirilməsinə böyük diqqət yetirilmişdir.

1940-1964-cü illərdə rus dilində tədris aparılan dəri və zöhrəvi xəstəliklər kafedrasına əməkdar elm xadimi, t.e.d., professor Bahadur Əsgər oğlu Eyvazov (1907-1987) rəhbərlik etmişdir. B.Ə.Eyvazov kafedrada 1929-cu ildən fəaliyyət göstərmişdir. O, 1936-cı ildə “Klinika və patoloji anatomiya – favusun histogenezi” mövzusunda doktorluq dissertasiyasını müdafiə etmişdir. B.Ə.Eyvazov 1946-1964-cü illərdə rus dilində tədris aparılan dəri və zöhrəvi xəstəliklər kafedrasının müdiri olmaqla eyni zamanda Azərbaycan Dövlət Universitetində rektor vəzifəsində çalışmışdır. Onun rəhbərliyi altında kafedrada dermatomikozların, sifilisin epidemiologiya, klinika, müalicəsi üzrə tədqiqatlar aparılmışdır. B.Ə.Eyvazov respublikada ali tibbi təhsilin təşkilində, ixtisaslı elmi və təcrübi kadrların hazırlanmasında aktiv iştirak etmiş, yoluxucu dəri və zöhrəvi xəstəlikləri ilə mübarizədə səhiyyə müəssisələrinə yaxından yardım göstərmiş, görkəmli ictimai xadim olmuşdur. O, respublikanın bir çox ictimai təşkilatlarının rəhbər heyətinin tərkibində üzv olmuş və dövlət mükafatları ilə təltif edilmişdir.  

1964-1990-cı illərdə dəri və zöhrəvi xəstəliklər kafedrasına t.e.d., professor Rasim Hacı oğlu Hacıyev (1926-1999) rəhbərlik etmişdir. Onun əmək fəaliyyəti 1955-ci ildən Azərbaycan Tibb İnstitutunun dəri və zöhrəvi xəstəliklər kafedrası ilə qırılmaz bağlı olmuşdur. R.H.Hacıyev 1965-ci ildə “Dermatologiyada radiaktiv P-32 fosfor izotopunun tətbiqi. Klinik-eksperimental tədqiqat” mövzusunda doktorluq dissertasiyasını müvəffəqiyyətlə müdafiə etmişdir. Kafedraya rəhbərlik etdiyi dövrdə kafedranın tədris və metodik işində mühüm dəyişikliklər baş vermişdir. 1969-cu ildə dəri və zöhrəvi xəstəliklər kafedrasının azərbaycan və rus dillərində tədris aparan bölmələri birləşdirilmişdir. Görkəmli alim, istedadlı klinisist R.H.Hacıyev Azərbaycanda dermatovenerologiyanın inkişafına elmi zənginlik gətirmiş, özünün elmi dermatovenerologiya məktəbini yaratmışdır. Professor R.H.Hacıyev tərəfindən professor M.M.Davatdarova və dosent H.A.Hüseynzadənin həmmüəllifliyi ilə cinsi yolla yoluxan infeksiyalar üzrə “Zöhrəvi xəstəliklər” adlı ilk dərslik tərtib edilmişdir. Onun rəhbərliyi dövründə dəri və zöhrəvi xəstəliklər kafedrasının adı “dermatovenerologiya” (1987) adı ilə əvəz edilmişdir. Professor R.H.Hacıyev istedadlı pedaqoq olmaqla yanaşı respublikada milli tibb kadrlarının hazırlanması üçün əlindən gələni əsirgəməmişdir. Kafedrada onun rəhbərliyi altında yoluxucu dəri və zöhrəvi xəstəliklərin, nadir dermatozlar – genodermatozların patogenezi, klinikası, diaqnostikası və terapiyası öyrənilmişdir.      

1991-2008-ci illərdə dəri və zöhrəvi xəstəliklər kafedrasının müdiri əməkdar elm xadimi, t.e.d., professor Mina Müzəffər qızı Davatdarova (1935-2009) olmuşdur. Azərbaycan dermatovenerologiyasında ilk qadın - t.e.d., professor olan M.M.Davatdarova əmək fəaliyyətinə 1960-cı ildən ATİ-nun dəri və zöhrəvi xəstəliklər kafedrasında başlamışdır. 1991-ci ildə “Dərman toksidermiyasının inkişafının immun mexanizmi və onların efferent terapiya metodları” mövzusunda doktorluq dissertasiyasını müvəffəqiyyətlə müdafiə etmişdir. M.M.Davatdarova   dəri və zöhrəvi xəstəliklər kafedrasına rəhbərlik etməklə elmi-tədqiqat işini canlandırmışdır. M.M.Davatdarovanın rəhbərliyi altında kafedrada xroniki və ağır dermatozların, yoluxucu dəri və zöhrəvi xəstəliklərin patogenezi, müalicə və profilaktikasının problemlərinin işlənib hazırlanması davam etdirilmiş, Azərbaycan dermatologiyasında ilk dəfə efferent terapiya metodlarının  – plazmaferezin tətbiqinə başlanmışdır. 

2008-2017-ci illərdə dermatovenerologiya kafedrasına əməkdar elm xadimi, t.e.d., professor Zülfüqar Həsən oğlu Fərəcov (1950) rəhbərlik etmişdir. 1990-cı ildə Z.H.Fərəcov “Dərinin bədxassəli limfomaları və Kapoşi sarkoması” mövzusunda doktorluq dissertasiyasını müdafiə etmişdir. 1991-ci ildə Z.H.Fərəcov ATU-nun dermatovenerologiya kafedrasına professor seçilmişdir. Z.H.Fərəcovun rəhbərliyi altında kafedrada pemfiqus, dermatomikoz, sifilisin patogenez, diaqnostika və müalicəsi problemləri üzrə tədqiqatlar aparılmışdır. Z.H.Fərəcovun redaktəsi altında latın qrafikalı azərbaycan dilində ilk dərslik - “Dermatologiya” tərtib edilmişdir. 

2017-ci ildə t.ü.e.d., professor Fərid Rüfət oğlu Mahmudov (1959) dermatovenerologiya kafedrasına müdir vəzifəsinə seçilmişdir. F.R.Mahmudov 1990-cı ildən ATU-nun dermatovenerologiya kafedrasında çalışır, 1991-1993-cü illərdə kafedrada işləməsi ilə eyni zamanda RDZD-də baş həkim vəzifəsində fəaliyyət göstərmişdir. 2010-cu ildə F.R.Mahmudov “Генитальный герпес у мужчин в Азербайджане” mövzusunda doktorluq dissertasiyasını müdafiə etmişdir. F.R.Mahmudov kafedraya rəhbərlik etməklə kafedradaxili elmi-təcrübi konfransların keçirilməsini yeniləndirdi, rezidentlərin fəaliyyət dairəsini genişləndirdi. Kafedrada onun rəhbərliyi altında dəri leyşmaniozu, lipoid nekrobiozu, dermatomikozlar, sifilis üzrə elmi-tədqiqat işiləri yerinə yetirilir; latın qrafikalı azərbaycan dilində ilk dəfə - “Venerologiya”, “Dermatologiya”, rus dilində “Дерматовенерология”, ingilis dilində “Venereology” və “Dermatology” dərslikləri çapdan çıxmışdır.

Akademik heyət

1. Mahmudov Fərid Rüfət oğlu – Azərbaycan Respublikası Səhiyyə Nazirliyinin  dermatoveneroloqlar üzrə ekspert; Dermatovenerologiya kafedrasının müdiri,  tibb üzrə elmlər doktoru, professor

2. Fərəcov Zülfüqar Həsən oğlu  - tibb elmləri doktoru, əməkdar elm xadimi, professor-məsləhətçi

3. Novruzov Elşad Mirzəli oğlu –   tibb elmləri namizədi, dosent

4. Mirzəyev Yunis Ağalar oğlu –  tibb elmləri namizədi, dosent

5. Əhmədova Səbinə Cuvan qızı –  tibb üzrə fəlsəfə doktoru, dosent

6. Məmmədxanova İradə Arif qızı – tibb elmləri namizədi, dosent

7. Balakişiyeva Fikriyə İbrahim qızı – tibb elmləri namizədi, assistent

8. Məmmədova Gülnara Salam qızı  – tibb elmləri namizədi, assistent

9. Fərəcova Günay Zülfüqar qızı – tibb elmləri namizədi, assistent

10. Bəylərova Rəna Firudin qızı – assistent  

11. Hacıyeva Xırdaxanım Akif qızı– assistent

12. Nəsibov Əhməd Aydın oğlu – assistent

13. Cavadzadə Tavat Zahid qızı- baş laborant

14. İbrahimova Ləman Vahid qızı - baş laborant

15. Məhərrəmova Leyla Vidadi qızı - baş laborant

16. Adilova Xeyransa Malik qızı - baş laborant

17. Mahmudov Vahid Fərid oğlu - baş laborant

18. Mədətli Əsmər Nizami qızı - baş laborant