• 29/08/2025 10:51

Azərbaycan Tibb Universiteti (ATU) beynəlxalq əməkdaşlıq çərçivəsində daha bir uğurlu layihəyə imza atıb

 Türkiyənin Üsküdar Universitetinin Tibb fakültəsinin 4-cü kursunda təhsil alan dörd tələbə ATU-nun Tədris Cərrahiyyə Klinikasında və Psixiatriya kafedrasında iki aylıq klinik tədris-təcrübə proqramında iştirak ediblər.
Proqram müddətində tələbələr klinik biliklərini dərinləşdirib, nəzəri hazırlıqlarını praktik fəaliyyətlə möhkəmləndirmək imkanı qazanıblar. Onlar professor-müəllim heyətinin rəhbərliyi ilə müxtəlif ixtisas sahələrində müasir tibbi yanaşmaları öyrənərək peşəkar bacarıqlarını inkişaf etdiriblər. Təcrübə çərçivəsində tələbələr xəstələrlə ünsiyyət qurmaq, diaqnostik proseslərdə iştirak etmək, klinik müşahidələr aparmaqla yanaşı, multidissiplinar komandada işləmək bacarığı da əldə ediblər. Həmçinin seminarlar və elmi müzakirələr onların analitik düşünmə və qərarvermə vərdişlərinin daha da möhkəmlənməsinə şərait yaradıb.
ATU-da həyata keçirilən bu tədris-təcrübə proqramı tələbələrin akademik və praktiki hazırlığının gücləndirilməsinə, gələcək peşəkar fəaliyyətlərində beynəlxalq təcrübəyə əsaslanmalarına imkan verməklə yanaşı, Azərbaycan və Türkiyə universitetləri arasında elmi və tədris əlaqələrinin möhkəmləndirilməsinə də xidmət edir.