Əməkdaşımız Harvard Tibb Məktəbinin sertifikatını alıb

Oftalmologiya kafedrasının dosenti Nigar Sadıqova Harvard Tibb Məktəbi (Harvard Medical School - HMS) tərəfindən təşkil edilən beynəlxalq Tibb Tədrisinin Öyrədilməsi üzrə Təlim (Training to Teach in Medicine) sertifikat proqramını uğurla başa vurub

Harvard Tibb Məktəbinin Postgraduate medical education bölməsi tərəfindən həyata keçirilən bu nüfuzlu təlimin məqsədi səhiyyə mütəxəssislərinin pedaqoji bacarıqlarını inkişaf etdirməkdən ibarətdir. Proqram müasir və sübutlara əsaslanan tədris metodikaları, dərs planlaşdırma və qiymətləndirmə strategiyaları, klinik və akademik mühitlərdə effektiv öyrətmə bacarıqları, beynəlxalq pedaqoji təcrübə mübadiləsi imkanlarını təqdim edir.

Qəbul üçün doktorluq dərəcəsi (MD, PhD, PharmD, DMD və s.) və ya səhiyyə sahəsində peşəkar ixtisas, eləcə də müəllimlik və ya rəhbərlik təcrübəsi tələb olunur. Namizədlər digər sənədlərlə yanaşı, üç esse etməlidirlər. Training to Teach in Medicine proqramında esselər birbaşa onlayn ərizə formasında yazılır, başqa sözlə, müraciət zamanı real vaxtda doldurulur. Qəbul prosesinə, həmçinin müsahibə mərhələsi daxildir və bu, seçimdə əsas rol oynayır. Təşkilatçıların məlumatına görə, 2024-2025-ci il qəbul mərhələsində rəqabət çox yüksək olub: 100 müraciətdən yalnız biri qəbul edilib.

İnteraktiv onlayn sessiyalar, canlı seminarlar, komanda əsaslı layihələr və fərdi Capstone project mərhələlərindən ibarət olan təlim proqramı altı ay ərzində davam edib. Kurs çərçivəsində proqramın həmsədri, professor Jeremy Richards, Mount Auburn Hospital-da tibb təhsili üzrə mütəxəssis Brian Persaud, İsrailin Beth Deaconess Tibb Mərkəzinin klinik müəllimi dr. Lauren Yang, eləcə də Harvard Tibb Məktəbinin tanınmış professor və ekspertləri, aparıcı fakültə nümayəndələri dərs deyiblər.

Əməkdaşımız proqram çərçivəsində keçirilən inteqrasiya layihəsində müxtəlif ölkələrdən olan iştirakçılarla birlikdə komanda işində iştirak edib. Onun təmsil olunduğu komandanın layihəsi 2-ci yerə layiq görülüb. Bu nailiyyət ATU-da tibbi təhsilin keyfiyyətinin yüksəldilməsinə, müasir tədris strategiyalarının tətbiqinə və beynəlxalq akademik əlaqələrin genişlənməsinə dəyərli töhfə kimi qiymətləndirilə bilər.